Etiope bat Martitzen

Azken urte hauetan pisuz pisu ibili naiz, nire txokoaren bila, maletak gora, maletak behera.

Blogari moduan ere antzeko-parecido: urte eta erdi daramat saltsa honetan eta jada nire bigarren etxe hau abandonatzera noa hirugarren bat zabaltzeko.

Berdin da etxe-aldatzea zelako arduraz egiten duzun: bizi izan zaren leku horretan beti utziko duzu zerbait ahaztuta: ardi forma zuten etxeko zapatila batzuk abandonatu nituen behin pisu batean (pena handiz), Así habló Zaratustra liburukotea beste batean (irakurri gabe, gainera), top-mantako ez dakit zenbat disko azkeneko batean (egile-eskubideenganako errespetu bolada batean).

Martitzen ere horrela izango da, hainbat gauza geldituko dira hemendik sakabanatuta, guztia ez zait maletan kabituko eta.

Egun batzuk behar ditut etxe-aldatzea taxuz burutzeko, nire egoitza berria behar bezala txukuntzeko, baina egon lasai: laster izango duzue nire helbide berriaren… berri.